Á alheimsþingi Worldchefs, Alþjóðasamtaka matreiðslumanna, sem fram fer þessa dagana, tók Árni Þór Arnórsson, formaður KM Reykjavík, formlega við formennsku nefndarinnar Chefs Without Borders, eða Kokka án landamæra.

Chefs Without Borders er alþjóðleg mannúðar- og hjálparnefnd á vegum Worldchefs sem vinnur að verkefnum tengdum neyðaraðstoð, matvælaöryggi og samfélagslegri ábyrgð matreiðslumanna um allan heim. Nefndin hefur meðal annars komið að stuðningi við samfélög sem hafa orðið fyrir áhrifum náttúruhamfara, stríðsátaka og annarra hamfara, auk þess að efla samstöðu matreiðslumanna þvert á landamæri.

Það er mikill heiður fyrir Árna Þór, sem og fyrir Klúbb matreiðslumeistara, að honum hafi verið treyst fyrir þessu mikilvæga alþjóðlega hlutverki. Skipun hans endurspeglar það traust og þá virðingu sem íslenskir matreiðslumenn njóta á alþjóðavettvangi.



Klúbbur matreiðslumeistara óskar Árna Þór innilega til hamingju með þetta mikilvæga verkefni og hlakkar til að fylgjast með áframhaldandi störfum hans í þágu alþjóðasamfélags matreiðslumanna.